គណបក្សប្រឆាំង ចាប់ផ្តើមធ្វើបាតុកម្ម នៅទីលាន ប្រជាធិបតេយ្យ

ភ្នំពេញ៖ ដូចអ្វីដែលខ្លួន បានគ្រោងទុកនោះ នៅព្រឹកថ្ងៃអាទិត្យ​ទី១៥ ខែធ្នូ ឆ្នាំ២០១៣នេះ គណបក្ស សង្គ្រោះជាតិ ដឹកនាំដោយ លោក សម រង្ស៊ី និងលោក កឹម សុខា បានចាប់ផ្តើមធ្វើបាតុកម្ម ដោយអហិង្សា និងសន្តិវិធី ជាបណ្តើរៗហើយ នៅទីលានប្រជា​ធិប​តេយ្យ ខណៈដែល សមាជិក សមាជិកា របស់ខ្លួនបានធ្វើដំណើរ ទៅចូលរួម នៅទីនោះ ជាបន្តបន្ទាប់ ។

តាមការគ្រោងទុក លោក សម រង្ស៊ី និងលោក កឹម សុខា នឹងចូលរួមដឹកនាំការតវ៉ា នៅទីលានប្រជា​ធិប​​តេយ្យ នារសៀលថ្ងៃដដែលនេះ។ មេដឹកនាំគណបក្ស សង្គ្រោះជាតិ ទាំង២នាក់ បានប្រកាស​ហើយ​ថា ចាប់ពីថ្ងៃទី១៥ ខែធ្នូ ឆ្នាំ២០១៣នេះតទៅ ពួកគេនឹងដឹកនាំបាតុកម្ម ដោយអហិង្សា និង​សន្តិវិ​ធី ជារៀងរាល់ថ្ងៃ ដើម្បីទាមទារ ឲ្យមានការបោះឆ្នោតឡើងវិញ សម្រាប់មួយឆ្នាំនេះ ។

ជាមួយគ្នានេះ មេដឹកនាំគណបក្សប្រឆាំង បានប្រកាសថា នឹងធ្វើការដង្ហែក្បួន នៅតាមផ្លូវសំខាន់ៗ មួយចំនួន នៅក្នុងរាជធានីភ្នំពេញ ខណៈដែលសាលារាជធានីភ្នំពេញ បានប្រកាសឲ្យ ប្រជាពលរដ្ឋ ដែលនៅតាមដងផ្លូវ នៃការដង្ហែក្បួននោះ ត្រូវមានការប្រុងប្រយ័ត្ន ចំពោះការខាតបង់ ទ្រព្យសម្បត្តិ និងការរំខានណាមួយ ពីជនឱកាសនិយម។

យ៉ាងណាក៏ដោយ កម្លាំង សមត្ថកិច្ច ជាច្រើននាក់ រួមទាំងនគរបាល និងអាវុធហត្ថ ត្រូវបានដាក់​ពង្រាយ ដើម្បីការពារសុវត្ថិភាព និងសណ្តប់ធ្នាប់ នៃការជួបជុំ របស់គណបក្ស សង្គ្រោះជាតិ។ គិតត្រឹមវេលាម៉ោងប្រមាណ ៨៖១០នាទី ព្រឹកថ្ងៃអាទិត្យ នេះ នៅទីលានប្រជាធិបតេយ្យ មានអ្នកចូលរួមធ្វើបាតុកម្ម ប្រហែល៤០០នាក់ហើយ៕

ប្រភពៈ ភូមិអច្ឆរិយៈ