លោក អាង គឹមអៀង ប្រធានសមាគមទីភ្នាក់ងារទេសចរណ៍កម្ពុជា បានមានប្រសាសន៍ថា ក្រុមហ៊ុនទីភ្នាក់ងារទេសចរណ៍ មិនបានបូកសរុបឲ្យបានជាក់លាក់ពីចំនួនធ្លាក់ចុះ ដែលពលរដ្ឋកម្ពុជា លុបចោលដំណើរទៅកាន់ប្រទេសថៃ នៅពេលទីក្រុងបាងកក មានបាតុកម្មចលាចលនោះទេ។
ប៉ុន្តែលោក អាង គឹមអៀង បានបញ្ជាក់ថា "ជាសភាវទូទៅ គឺថាទាំងទេសចរ និងទាំងអ្នកជំនួញ នៅតំបន់នោះ មានភាពមិនប្រក្រតី ឬមានបាតុកម្ម កូដកម្ម ហើយម្យ៉ាងទៀត បាតុកម្មនៅថៃ វាធ្ងន់ធ្ងរ ហើយស៊ីជម្រៅ ដែលមិនអាចស្មានដល់ ពិបាកស្មាន ដូចជាករណីបិទព្រលានយន្តហោះ វាកម្រមាននៅថៃ។ អីចឹង កុំថាឡើយ ប្រជាពលរដ្ឋខ្មែរយើង សូម្បីតែប្រទេសជាច្រើននៅលើពិភពលោក គេមានចេញបម្រាមដល់ប្រជាជនគេ ឲ្យប្រុងប្រយ័ត្ន ចំពោះព្រឹត្តិការណ៍បាតុកម្ម នៅបាងកកនោះ"។
លោក អាង គឹមអៀង មិនមានតួលេខពីការធ្លាក់ចុះពលរដ្ឋខ្មែរ ធ្វើដំណើរទៅថៃ នៅពេលនេះទេ។ តែលោកថា អាចមានការធ្លាក់ចុះ ទាំងអ្នកទៅធ្វើជំនួញក្តី និងទាំងអ្នកទៅកំសាន្តក្តី គឺទាល់តែកន្លែងនោះ មានសុវត្ថិភាព ទើបគេទៅ។
ប្រធានសមាគមទីភ្នាក់ងារទេសចរណ៍កម្ពុជា ក៏បានបន្ថែមថា ពលរដ្ឋកម្ពុជាយើង មួយឆ្នាំៗ ទៅថៃច្រើនណាស់។ តែលោក មិនមានតួលេខបញ្ជាក់ច្បាស់លាស់ទេ។ គឺទាំងពលករ ទាំងអ្នកទៅកំសាន្ត និងទាំងអ្នកទៅធ្វើអាជីវកម្ម ព្រមទាំងអ្នកទៅពេទ្យ នៅថៃច្រើនណាស់។ ក្នុងចំណោមប្រទេសជិតខាងកម្ពុជានេះ គឺប្រទេសថៃ ជាគោលដៅខ្ពស់សម្រាប់ខ្មែរយើង។
ចំណែកក្រុមហ៊ុនទេសរណ៍ មួយចំនួនដែលបានសួរអំពីការលក់សំបុត្រយន្តហោះទៅកាន់ទីក្រុងបាងកក នោះបាននិយាយថា ការលក់សំបុត្រទៅបាងកកពិតជាមានការធ្លាក់ចុះ។
ជាមួយនឹងការលើកឡើងខាងលើនេះ លោក អាង គឹមអៀង ក៏បានបង្ហាញការព្រួយបារម្ភតិចតួច ចំពោះសភាពការណ៍បាតុកម្ម នៅបាងកក ចំពោះការប៉ះពាល់លើវិស័យទេសចរណ៍កម្ពុជា នៅពេលនេះ។ មូលហេតុ មកពីទី១-ដោយសារតែប្រទេសថៃ មិនមែនជាច្រកតែមួយ សម្រាប់ទេសចរបរទេស ឆ្លងកាត់ចូលមកកម្ពុជាយើងទេ និងទី២-ព្រលានយន្តហោះថៃ ក៏នៅដំណើរ ផ្លូវគោកមកកម្ពុជា ក៏នៅដំណើរការ ពោលគឺច្រកផ្លូវ ដែលតពីថៃ មកកម្ពុជាយើង មិនត្រូវបានរំខាននៅឡើយទេ។
លោក អាង គឹមអៀង បានបញ្ជាក់ថា "ភ្ញៀវទេសចរ ដែលមកទស្សនាកម្ពុជា ដោយប្រើប្រាស់ប្រទេសថៃ ជាកន្លែងឆ្លងកាត់នោះ អាចបន្តដំណើរមកកម្ពុជា បានជាធម្មតា តាមយន្តហោះក្តី និងតាមផ្លូវគោកក្តី។ ដូច្នេះ ពេលនេះ ខ្ញុំមានការបារម្ភតិចតួច ចំពោះបាតុកម្មនៅបាងកក លើឥទ្ធិពល ដែលជះមកលើទេសចរណ៍កម្ពុជាយើង"។
ដោយឡែកលោក ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា ក្រសួងទេសចរណ៍ និងក្រុមហ៊ុនទីភ្នាក់ងារទេសចរណ៍ បានជួបប្រជុំគ្នា កាលពីថ្ងៃទី២៨វិច្ឆិកា ហើយបានវាយតម្លៃថា មកដល់ពេលនេះ បាតុកម្មនៅថៃ មិនទាន់មានអីប៉ះពាល់ដល់វិស័យទេសចរណ៍កម្ពុជាយើងនៅឡើយទេ ពិសេសគឺភ្ញៀវទេសចរ ប្រទេសទីបី ( អ្នកចូលតាមថៃ មកកម្ពុជា )។ ប៉ុន្តែមានការថយចុះនូវចំនួនភ្ញៀវទេសចរ ជនជាតិថៃខ្លះ ចូលមកកម្ពុជា។
លោក ថោង ខុន បានបញ្ជាក់ថា "ទេសចរប្រទេសទីបី ដែលចូលមកកម្ពុជា តាមប្រទេសថៃ គឺមិនមានការថយទេ។ តែនៅឯថៃ គឺអ្នកទេសចរបរទេស ចូលទៅថៃ ថយជិត ៣០ ម៉ឺននាក់ ក្នុងរយៈពេលបាតុកម្មប៉ុន្មានថ្ងៃនេះ នៅបាងកក។ ប៉ុន្តែចំពោះប្រទេសយើង អត់ទាន់មានផលប៉ះពាល់ទេ ពីព្រោះប្រទេសទី៣ កាលណា គេមកយើង ជួនកាលគេមកតាមព្រលានយន្តហោះ សុវណ្ណភូមិ របស់ថៃ នៅបាងកក គឺគេហោះមកយើងតែម្តង។ ជួនកាល គេក៏មកតាមផ្លូវគោក ភាគខាងត្បូងថៃ មកយើង តាមច្រកប៉ោយប៉ែត និងតាមច្រកកោះកុង។ អីចឹង យើងឃើញថា ភ្ញៀវទេសចរបរទេស ដែលចូលមកកម្ពុជាយើង តាមច្រកថៃ មានសមាមាត្រប្រហែលជា ៣៧%។ តែឥឡូវ មិនមានផលប៉ះពាល់ធំទេ។ គឺមានតែទេសចរថៃទេ ដែលថយចុះ ក្នុងការចូលមកលេងនៅកម្ពុជាយើង"៕
ទីក្រុងបាងកក ប្រទេសថៃ នៅពេលនេះកំពុងមានបាតុកម្មចលាចល
No comments:
Post a Comment