ភ្នំពេញ: ប្រធានមន្ទីរមួយរូបនៅខេត្តកំពង់ធំ
ត្រូវបានអង្គភាពប្រឆាំងអំពើពុករលួយ បញ្ជូនសំណុំរឿង ទៅកាន់តុលាការខេត្ត
ទាក់ទងទៅនឹងការប្រព្រឹត្តអំពើពុករលួយ កឹបកេងថវិការដ្ឋ
និងក្លែងឯកសារ
ដើម្បីឲ្យតុលាការចាត់ការទៅតាមផ្លូវច្បាប់។ទន្ទឹមនឹងនេះ
មន្ត្រីមួយចំនួន នៅខេត្តបាត់ដំបង និងសៀមរាប
ក៍កំពុងតែប្រឈមមុខទៅនឹងច្បាប់ផងដែរ ក្រោមការចោទប្រកាន់ពីបទ
ប្រព្រឹត្តអំពើពុករលួយ។ប្រធានមន្ទីរមួយរូបនៅខេត្តកំពង់ធំ
ដែលជាប់ពាក់ព័ន្ធក្នុងការប្រព្រឹត្តអំពើពុករលួយ
រួមទាំងមន្ត្រីខេត្តបាត់ដំបង និងសៀមរាប
មិនត្រូវបានគេបង្ហើបឲ្យដឹងថា ជាប្រធានមន្ទីរណាមួយនៅឡើយទេ
និងមានឈ្មោះអ្វីនៅឡើយដែរ។
លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានមានប្រសាសន៍ ប្រាប់គេហទំព័រ CEN ឲ្យដឹងថា ចំពោះករណីនៅខេត្តកំពង់ធំនេះ ជាករណីដំបូងបំផុត ដែលអង្គភាពប្រឆាំងអំពើពុករលួយ បានបញ្ជូនសំណុំរឿងទៅតុលាការ ដោយអត់មានការនាំខ្លួនទៅទេ ដើម្បីទុកឲ្យគេ តទល់ជាមួយយើងនៅខាងតុលាការ។
លោកទេសរដ្ឋមន្ត្រី បានបន្តថា ទាក់ទងការប្រព្រឹត្តអំពើពុករលួយ នៅខេត្តកំពង់ធំ គឺថ្នាក់ប្រធានមន្ទីរ ហើយចំពោះមន្ទីរណាមួយនោះ ខាងអង្គភាពប្រឆាំងអំពើពុករលួយ សូមរក្សាទុកសិន។ ហើយប្រធានមន្ទីរ ដែលជាប់ទាក់ទងក្នុងការប្រព្រឹត្តអំពើពុករលួយ គឺជាបទកេងយកផលប្រយោជន៍ ដោយខុសច្បាប់ ហើយក៍អាចចូលទៅដល់បញ្ហា មានការក្លែងឯកសារទៀតផង។
ចំពោះករណីអំពើពុករលួយ នៅខេត្តបាត់ដំបងនោះ លោកទេសរដ្ឋមន្ត្រី ឱម យ៉ិនទៀង បានលើកឡើងថា អង្គភាពប្រឆាំងអំពើពុករលួយ កំពុងតែដំណើរការច្រើន និងនៅដំណើរការថែមទៀត។ ដូចខាងខេត្តកំពង់ធំ អាចចប់ហើយ ប៉ុន្តែបញ្ជូនសំណុំរឿងទៅតុលាការ រាល់ករណី យើងតែងតែចាប់មមនុស្ស ហើយបញ្ជូនមនុស្សទៅ បញ្ជូនសំណុំរឿង។ ប៉ុន្តែករណីនេះ អាស្រ័យដោយមិនមែនបទល្មើសជាក់ស្តែង បទល្មើសកើតមកពីមុន ហើយយើងរកឃើញ ដូច្នេះអត់អាចចាប់មនុស្សយកទៅទេ បញ្ជូនសំណុំរឿងទៅតុលាការ តុលាការកោះហៅសួរតាមនឹងទៅ ស្រេចតែតុលាការធ្វើការវិនិច្ឆ័យ ហើយគាត់ក៍អាចមានសិទ្ធិពេញលេញ តទល់ជាមួយជាមួយអង្គភាពប្រឆាំងអំពើពុករលួយ ពេញដៃពេញជើង។
អង្គភាពប្រឆាំងអំពើពុករលួយ បានចេញសេចក្តីជូនដំណឹង ចុះថ្ងៃទី២៦ ខែវិច្ឆិកា ឆ្នាំ២០១៣ បានឲ្យដឹងថា ក្រុមប្រឹក្សាជាតិប្រឆាំងអំពើពុករលួយ បានស្ដាប់របាយការណ៍ការងារ ក្នុងខែវិច្ឆិកា ឆ្នាំ២០១៣ របស់ប្រធានអង្គភាពប្រឆាំងអំពើពុករលួយ ដូចជា៖ករណីមិនប្រកាសទ្រព្យសម្បត្តិ និងបំណុល ពីសំណាក់មន្ត្រីជាន់ខ្ពស់ ដែលត្រូវបានបញ្ចប់ពីមុខតំណែង។ មន្ត្រីខ្មោច និងមន្ត្រីមានតែឈ្មោះ (មិនមកធ្វើការ) ក៏ជាមូលបទ នៃការកេងយកផលប្រយោជន៍ខុសច្បាប់ ដែលប្រធានស្ថាប័ន ប្រធានអង្គភាព ត្រូវទទួលខុសត្រូវ ចំពោះមុខច្បាប់។ ករណីប្រធានការិយាល័យសង្គមកិច្ចស្រុកស្រីសន្ធរ ខេត្តកំពង់ចាម ករណីនៅខេត្តព្រះសីហនុ ខេត្តកំពង់ធំ ខេត្តសៀមរាប ខេត្តបាត់ដំបង និងខេត្តមណ្ឌលគិរី ដែលអង្គភាពប្រឆាំងអំពើពុករលួយកំពុងដំណើរការ។ ករណីរបាយការណ៍របស់មូលនិធិពិភពលោក (Global Fund) ដែលបានលើកពីបាតុភាព នៅផ្នែកជំងឺគ្រុនចាញ់ ផ្នែកជំងឺអេដស៍ និងអង្គការមេឌីកាំ (Medicam)។
នៅក្នុងរយៈពេលប៉ុន្មានថ្ងៃមកនេះ អង្គភាពប្រឆាំងអំពើពុករលួយ បានធ្វើការចាប់ខ្លួន លោកភី រិទ្ធ អនុប្រធានសាខាពន្ធដារខេត្តព្រះសីហនុ និងលោកសួត សារីម បុគ្គលិកផ្នែកអាជីវកម្ម និងអ្នកស្រី នី សុពណ៌ មានតួនាទីជាជំនួយការបេឡា នៅអគ្គិសនីខេត្តមណ្ឌលគីរី បញ្ជូនទៅកាន់តុលាការ ដើម្បីចាត់ការតាមផ្លូវច្បាប់ ដើម្បីធ្វើការចោទប្រកាន់ ពាក់ព័ន្ធនឹងការប្រព្រឹត្តអំពើពុករលួយ កឹបកេងថវិការដ្ឋ ប្រមាណជា ១០ម៉ឺន ដុល្លារអាមេរិក និងការយកលុយលើសពីការកំណត់របស់រដ្ឋ។
អង្គភាពប្រឆាំង អំពើពុករលួយ នាពេលកន្លងមក បានធ្វើការចាត់វិធានការតាមផ្លូវច្បាប់ទៅលើមន្ត្រី នៅក្នុងក្រសួង ស្ថាប័នមួយចំនួន នៅក្នុងរដ្ឋាភិបាល ទាក់ទងទៅនឹងការប្រព្រឹត្តអំពើពុករលួយ ដូចជា លោកម៉ឹក ដារ៉ា អតីតអគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន និងជាអតីតនាយកមន្ទីរប្រឆាំងគ្រឿងញៀន ស្នងការខេត្តបន្ទាយមានជ័យ និងបក្ខពួក លោកតុប ច័ន្ទសេរីវុឌ្ឍ អតីតព្រះរាជអាជ្ញាខេត្តពោធិសាត់ លោកហួត ហ៊ាង អតីតចៅក្រមខេត្តកណ្តាល និងក្រឡាបញ្ជី និងមន្ត្រីក្រសួងដែនដីនគរូបនីយកម្ម និងសំណង់ លោកម៉ាង យូស្រេង ប្រធានការិយាល័យសង្គមកិច្ច ស្រុកស្រីសន្ធរ ខេត្តកំពង់ចាម លោកបោង ពុទ្ធារិទ្ធ ប្រធានមន្ទីរប្រភពកំលាំង នៃទីបញ្ជាការដ្ឋានកងរាជអាវុធហត្ថខេត្តពោធិសាត់ លោកនួន សារ៉ាត មន្ត្រីនាយកដ្ឋានរដ្ឋប្បវេណីក្រសួងយុត្តិធម៌ និងលោកកែវ សុផល ជាមន្ត្រីនគរបាលនាយកដ្ឋានការពារបេតិកភណ្ឌក្រសួងមហាផ្ទៃ... ជាដើម។
គួរបញ្ជាក់ថា រាជរដ្ឋាភិបាលអាណត្តិថ្មីដែលដឹកនាំដោយសម្តេចតេជោ ហ៊ុន សែន ជានាយករដ្ឋមន្ត្រី បានធ្វើការប្តេជ្ញាបន្តចាត់វិធានការណ៍ម៉ឹងម៉ាត់និងគ្មានការលើកលែង ចំពោះជនល្មើសនៃអំពើពុករលួយ។ ដើម្បីមានប្រសិទ្ធភាពនៃកិច្ចការនេះ រាជរដ្ឋាភិបាល នឹងបន្តពង្រឹងសមត្ថភាព របស់ស្ថាប័នប្រឆាំងអំពើពុករលួយ ពិសេសការងារដែលពាក់ព័ន្ធ នឹងការស៊ើបអង្កេតនិងការអនុវត្តច្បាប់៕
ប្រភពៈ CEN
No comments:
Post a Comment