ភ្នំពេញ: នៅព្រឹកថ្ងៃទី៣មករានេះ
មានការប៉ះ ទង្គិចជាថ្មីទៀត រវាងកងកម្លាំងសមត្ថកិច្ច និងក្រុមកម្មករ
នៅសួនឧស្សាហកម្ម កាណាឌីយ៉ា តាមផ្លូវវេងស្រេង ក្នុងរាជធានីភ្នំពេញ។
សមត្ថកិច្ច ចម្រុះ មានប៉ូលិស ប៉េអឹម និងទាហាន
បានបាញ់កាំភ្លើងគ្រាប់ពិត ដើម្បីបំបែកការតវ៉ា។ ក្នុងហេតុការណ៍នោះ
កម្លាំងសមត្ថកិច្ច និងកម្មកររបួសរៀងខ្លួន។
របាយការណ៍បឋមបង្ហាញថា មានកម្មករយ៉ាងហោចណាស់ ២ នាក់ ស្លាប់ និងជាង
១០ នាក់ របួស ដោយគ្រាប់កាំភ្លើង។សកម្មជនសិទ្ធិមនុស្ស លោក ចាន់ សាវ៉េត ដែលកំពុងតែតាមដានហេតុការណ៍ផ្ទុះហិង្សាជាថ្មី នៅសួនឧស្សាហកម្ម កាត់ដេរ កាណាឌីយ៉ា នាព្រឹកនេះ បានឲ្យដឹងថា យ៉ាងហោចណាស់ កម្មករ ២ នាក់ បានស្លាប់នៅនឹងកន្លែងដោយគ្រាប់កាំភ្លើង ជាង ១០ នាក់របួសធ្ងន់ និងកម្មករជាង ១០ នាក់ ត្រូវបានចាប់ខ្លួន។
ប៉ុន្តែបើតាមលោក ជួន ណារិន ស្នងការរងប៉ូលិសរាជធានីភ្នំពេញ បានបញ្ជាក់ថា ក្នុងហេតុការណ៍នោះ មានកម្មករ ៣ នាក់ បានស្លាប់ នៅនឹងកន្លែងកើតហេតុ ២នាក់របួស និង២នាក់ ត្រូវចាប់ខ្លួន។
មកដល់ម៉ោងជាង ១១ ព្រឹកនេះ ក្រុមសមត្ថកិច្ចចម្រុះ បានបំបែក និងកាន់កាប់កំណាត់ផ្លូវវេងស្រេង នៅមុខសួនឧស្សាហកម្ម កាណាឌីយ៉ា។ ក្រុមសមត្ថកិច្ច បន្តតាមបង្ក្រាបក្រុមកម្មករ ដល់ក្នុងបន្ទប់ផ្ទះជួល ដែលស្ថិតនៅជិតសួនឧស្សាហកម្ម កាណាឌីយ៉ា។
ជាការកត់សម្គាល់ ការប៉ះទង្គិចរវាងកងកម្លាំងចម្រុះ ប៉ូលិសប៉េអឹម និងក្រុមកម្មករ នៅមុខសួនឧស្សាហកម្មកាណាឌីយ៉ា តាមផ្លូវវេងស្រេង បានកើតឡើងយ៉ាងហិង្សា កាលពីយប់ រំលងអធ្រាត្រ ថ្ងៃទី២ ឈានចូលថ្ងៃទី៣មករានេះ បានបណ្តាលឲ្យរងរបួសទាំងកម្លាំងចម្រុះ និងកម្មករ ហើយកងកម្លាំងចម្រុះ បានឃាត់ខ្លួនកម្មករ ២ នាក់។ នេះបើតាមលោកឧត្តមសេនីយ៍ ខេង ទីតូ អ្នកនាំពាក្យប៉េអឹម។
លោក ខេង ទីតូ បានឲ្យដឹងថា ក្នុងប្រតិបត្តិការរៀបចំសណ្តាប់ធ្នាប់រៀបរយនោះ ខាងកងកម្លាំងសមត្ថកិច្ច រងរបួស ៩ នាក់ ដោយសារតែក្រុមកម្មករ គាប់ដុំថ្ម និងប្រើជំពាមកៅស៊ូ។ ក្នុងនោះ កងកម្លាំងសមត្ថកិច្ច បានឃាត់ខ្លួនកម្មករ ២ នាក់។ ដោយឡែកចំនួនកម្មកររបួស មិនត្រូវបានគេរាយការណ៍ទេ។
នៅមុខសួនឧស្សាហកម្ម កាណាឌីយ៉ា តាមផ្លូវវេងស្រេង ក្នុងរាជធានីភ្នំពេញ ក្រុមកម្មករបានតវ៉ាបិទផ្លូវចាប់តាំងពីព្រឹកព្រលឹមថ្ងៃទី២មករា រហូតដល់ព្រលប់ថ្ងៃទី២ ខែមករា ឆ្នាំ២០១៤ ក៏ផ្ទុះឡើងនូវអំពើហិង្សា បង្កឡើងដោយក្រុមកម្មករ វាយកម្ទេចទ្រព្យសម្បត្តិរោងចក្រ ដុតម៉ូតូ និងឡានផងដែរ។
រហូតដល់ម៉ោង ១យប់ ទើបកម្លាំងចម្រុះ បានបើកប្រតិបត្តិការ បង្ក្រាបលើក្រុមកម្មករ។ ប្រតិបត្តិការ ប៉ះទង្គិចនោះ បានកើតឡើងរហូតដល់ម៉ោងជិត ៤ ទៀបភ្លឺ ទើបឈប់។
ក្រុមកម្មករ ដែលជាយុវជន បានផ្ទុះកំហឹង ដុតម៉ូតូកង់ និងវាយរបងរោងចក្រ ជាដើម នៅមុខសួនឧស្សាហកម្មកាណាឌីយ៉ា នៅផ្លូវវេងស្រេង បន្ទាប់ពីក្រុមកងកម្លាំងសមត្ថកិច្ចប៉ូលិស និងទាហាន បានចុះទៅបង្ក្រាបកូដកម្មបិទផ្លូវ កាលពីល្ងាចថ្ងៃទី២មករា។
រហូតដល់ព្រឹកថ្ងៃសុក្រ ទី៣មករានេះ ក្រុមកម្មកររាប់រយនាក់ បានប្រមូលផ្តុំតវ៉ា បិទផ្លូវវេងស្រេង នៅមុខសួនឧស្សាហកម្មកាណាឌីយ៉ា៕ H
ប្រភពៈ CEN
No comments:
Post a Comment