ភ្នាក់​ងារ FBI តាម​ចាប់ខ្លួន​បុរសជន​ជាតិ​អាមេរិក​ដល់​កម្ពុជា

រាជ​ធានីភ្នំពេ​ញ​​​ ​៖ ​បុរស​ជន​ជាតិ ​អាមេរិកាំង​ម្នាក់​​ឈ្មោះ Daniel Stephen Joh San អាយុ​៣៥​ឆ្នាំ ​​ត្រូវ​បាន​​​នគរ​បាល​​ នាយកដ្ឋាន ​ប្រឆាំង​ការជួញ​ដូរមនុស្ស​ និង​ការ​ពារ​នីតិ​ជន ​ក្រសួង​មហា​ផ្ទៃ​​ សហការ​ ជាមួយ​​ភ្នាក់​​​ងារ FBI សហរដ្ឋ​អាមេរិក ​ចាប់ខ្លួន​នៅ​ចំណុច​​ ផ្ទះ​​គ្មា​ន​លេខ ​ភូមិ​សន្សំ​កុសលទី​៣ ​សង្កាត់​​បឹង​ទំពុន​​ ខណ្ឌ​មាន​ជ័យ កាលពី​ព្រឹក​ថ្ងៃទី​៩ ខែ ធ្នូ ពាក់ព័ន្ធ​​ នឹង​បទ​ល្មើស​​រំលោ​ភ​បំពាន​ផ្លូវ​ភេទ ដែល​បាន​​​ប្រព្រឹត្ត​​​នៅ​​​សហ​រដ្ឋ​​អាមេរិក​ចំនួន ​​៥​ករណី ​។ ​

​តាម​ប្រភព​ព័ត៌​មាន​នៅ​កន្លែង​ឃាត់​ខ្លួន​​​ជន​ជាតិ​ អាមេរិក​​ខាងលើ​នេះ​បាន​ឱ្យដឹង​​ថា ​កន្លែង​ដែល​រូប​គេកំពុង​ស្នាក់​នៅ​គឺជ្រក​ក្រោម​ស្លាក​​អង្គ​ការ​​ឈ្មោះ​ Hopetransitinos ​​ដែលមាន​ការ​ប្រមូល​ផ្តុំ​កុមារ​កម្ពុជា​​ចំនួន​៣២​នាក់ ​(ប្រុស​២១​នាក់ ​ស្រី​១១​នាក់) ​ក្នុង​នោះភាគច្រើន​គឺមាន​អាយុ​ក្រោម​១៨ឆ្នាំ ​​។ ​

ប៉ុន្តែ​ឈ្មោះ​អង្គការ​នេះ​ត្រូវ​បាន​មន្ត្រី​នៃ​មន្ទីរ​សង្គម​កិច្ច​​ អតីត​យុទ្ធ​ជន​ ​និង​យុវ​នី​តិ​សម្បទារាជ​ធានីភ្នំពេញ ​បដិសេធ​ថា ​ជាអង្គ​ការ​គ្មាន​​ច្បាប់ទម្លាប់​​ត្រឹមត្រូវ​នោះ​ទេ ​។ ​​ទោះជា​យ៉ាង​នេះ​ក្តី​ក៏​នៅ​​​ក្នុង​បរិវេណ​នៃ​អង្គការ​នេះ ​មាន​រចនា​សម្ព័ន្ធ​​ត្រឹម​ត្រូវ ​មាន​ជន​ប​រ​ទេស​​និងខ្មែរ ​ស្នាក់​នៅ​ចម្រុះ​គ្នា ដែល​ក្នុង​នោះ​​លោក​ Daniel Stephen Joh San មាន​តួនាទី​​ជា​ប្រធាន​អង្គ​ការ​នេះ ​។ ​មន្ត្រី​នៃ​ម​ន្ទីរ​សង្គម​កិច្ច​​អតីត​យុទ្ធ​ជន​ និង​យុវ​នីតិ​សម្ប​ទា​​រាជ​ធានីភ្នំពេញបាន​​ឱ្យដឹង​ជុំ​វិញ ​ការ​​​​ចាប់ខ្លួន​​បុរស​​ជន​ជាតិ​អាមេរិក​​ខាងលើ​នេះ​​ថា ចំពោះ​កុមារ​ទាំង​នោះ គឺមន្ទីរ​​ជំនាញ​​ត្រូវរៀបចំ​រក​កន្លែង​ស្នាក់នៅរៀន​សូត្រ​ឱ្យ​ពួកគេ​បន្ត​ ពី​ឈ្មោះ​ Daniel Stephen Joh San ​​ដែល​ត្រូវ​​បាន​ចាប់ខ្លួន ​បញ្ជូន​​ទៅ​​សហ​រដ្ឋ​​​​អាមេរិក​វិញ ​។ ​ការលើក​​ឡើងដូច្នេះ​​ដោយសារ ​កុមារទាំង​នោះ ភាគច្រើន​​គឺជា​ជន​​គ្មាន​ទី​ពឹង ​​ប៉ុន្តែ​​បើ​ក្មេងណា​មាន​ឪពុក​ម្តាយ​ ឬ​អាណា​ព្យាបាល ​ច្បាស់​​លាស់​នោះ សមត្ថកិច្ច​​នឹង​មន្ត្រី​ជំនាញ​អនុ​ញ្ញាត​ឱ្យពួកគេ​​ទៅរួមរស់​ជា​មួយ​ក្រុម​ គ្រួសារវិញ ។

​ដោយ​ឡែក​​ជន​ឈ្មោះ​ Daniel Stephen Joh San ​ក្រោ​យ​ពេល​ឃាត់ខ្លួន គឺសមត្ថកិច្ច​​សហការជា​មួយ​FBI អាមេរិក ​​សម្រេច​បញ្ជូន​ខ្លួន​គេទៅ​នាយក​ដ្ឋាន​ជន​បរ​ទេស ​ដើម្បី​រៀប​ចំ​សំណុំ​បែប​បទ ​បញ្ជូន​​​ទៅ​សហ​រដ្ឋ​​​អាមេរិក​​វិញ ​។ ​ចំពោះកិច្ច​សហការ​បង្ក្រា​ប​បទ​ល្មើស​រំលោភ​បំពាន​​ផ្លូវភេទ​​នេះ ​មន្ត្រី​ដែល​មាន​ភារកិច្ច​​​​ក្នុង​​ប្រតិ​បត្តិ​ការ​​​នេះ​​​​និយាយ​ថា ​​​គឺ​​យោង​ទៅ​តាម​បទ​បញ្ជា​របស់​ លោក​នាយឧត្តម​សេនីយ៍​ នេត ​សាវឿន អគ្គ​ស្នងការ​​នគរបាល​ជាតិ ។ ​​​បទ​ល្មើស​ដែល​​​ជន​ឈ្មោះ​​ Daniel Stephen Joh San ​​ប្រព្រឹត្តនៅ​សហ​រដ្ឋ​​​អាមេរិក​​​ មាន​៥ករណី ដែល​​សមត្ថ​កិច្ច​​មាន​ឈ្មោះ​​ជន​រងគ្រោះ​ទាំងអស់ ​ប៉ុន្តែ​​មិន​អាច​បង្ហាញ​ជា​សាធារណៈ​បាន​ឡើយ ពាក់​​ព័ន្ធ​​នឹង​សិទិ្ធ​បុគ្គល ។ ​​ប៉ុន្តែ​អ្វី​ដែល​បាន​អនុ​វត្ត​ឡើង គឺតាម​ដីកា​ចាប់​ខ្លួន​​របស់​តុលាការ​អាមេរិក ។

​សូម​បញ្ជាក់ថា ​​អង្គ​​​ការ​មួយ​​នេះ​​ ទើបមក​ជួល​​ផ្ទះ​ខាងលើ​ធ្វើ​ជា​ការស្នាក់​ការ​​កាលពី​ខែ​សីហា ​ឆ្នាំ​២០១៣​ ថ្មី​ៗ​នេះ ហើយ​ឈ្មោះ​ Daniel Stephen Joh San ក៏​ទើប​ចូល​មក​ស្រុក​ខ្មែរ ​កាលពី​ពេល​ថ្មី​​នេះដែរ ៕

ប្រភពៈសក្កដា